ਦਿੱਲੀ 'ਚ ਹੁਮਾਯੂੰ ਮਕਬਰੇ ਦਾ ਹਿੱਸਾ ਢਹਿਆ, ਕਈ ਲੋਕ ਮਲਬੇ ਹੇਠ ਫਸੇ

ਆਜ਼ਾਦੀ ਦਿਵਸ ਦੀਆਂ ਖੁਸ਼ੀਆਂ ਦੇ ਦਰਮਿਆਨ, ਰਾਜਧਾਨੀ ਦਿੱਲੀ ਤੋਂ ਇਕ ਪਰੇਸ਼ਾਨ ਕਰਨ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ਸ਼ੁੱਕਰਵਾਰ ਸ਼ਾਮ ਕਰੀਬ 4:30 ਵਜੇ ਇਤਿਹਾਸਕ ਹੁਮਾਯੂੰ ਮਕਬਰੇ ਦੇ ਗੁੰਬਦ ਦਾ ਇੱਕ ਹਿੱਸਾ ਅਚਾਨਕ ਢਹਿ ਗਿਆ। ਹਾਦਸੇ ਨਾਲ ਮੌਕੇ 'ਤੇ ਹੜਕੰਪ ਮਚ ਗਿਆ ਅਤੇ ਸ਼ੁਰੂਆਤੀ ਰਿਪੋਰਟਾਂ ਅਨੁਸਾਰ 8-9 ਲੋਕ ਮਲਬੇ ਹੇਠ ਫਸ ਗਏ ਹਨ।

ਪਹਿਲਾਂ ਖ਼ਬਰ ਆਈ ਸੀ ਕਿ ਮਕਬਰੇ ਦੇ ਪਿੱਛੇ ਸਥਿਤ ਇੱਕ ਦਰਗਾਹ ਡਿੱਗੀ ਹੈ, ਪਰ ਜਾਂਚ 'ਚ ਪਤਾ ਲੱਗਾ ਕਿ ਇਹ ਗੁੰਬਦ ਦਾ ਹਿੱਸਾ ਸੀ। ਸੂਚਨਾ ਮਿਲਦੇ ਹੀ ਸਥਾਨਕ ਪੁਲਿਸ, ਫਾਇਰ ਬ੍ਰਿਗੇਡ ਅਤੇ ਰਾਹਤ ਟੀਮਾਂ ਨੇ ਜੰਗੀ ਪੱਧਰ 'ਤੇ ਕਾਰਵਾਈ ਸ਼ੁਰੂ ਕਰ ਦਿੱਤੀ।

16ਵੀਂ ਸਦੀ ਵਿੱਚ ਬਣਿਆ ਇਹ ਸ਼ਾਨਦਾਰ ਸਮਾਰਕ ਯੂਨੈਸਕੋ ਦੀ ਵਿਸ਼ਵ ਵਿਰਾਸਤ ਸੂਚੀ ਵਿੱਚ ਦਰਜ ਹੈ ਅਤੇ ਦੇਸ਼-ਵਿਦੇਸ਼ ਤੋਂ ਆਉਣ ਵਾਲੇ ਸੈਲਾਨੀਆਂ ਦਾ ਮੁੱਖ ਆਕਰਸ਼ਣ ਹੈ। ਹਾਦਸੇ ਵੇਲੇ ਵੀ ਇੱਥੇ ਭਾਰੀ ਗਿਣਤੀ ਵਿੱਚ ਲੋਕ ਮੌਜੂਦ ਸਨ। ਅਧਿਕਾਰੀਆਂ ਮੁਤਾਬਕ ਬਚਾਅ ਅਭਿਆਨ ਜਾਰੀ ਹੈ ਅਤੇ ਕੁਝ ਮੌਤਾਂ ਹੋਣ ਦੀ ਵੀ ਆਸ਼ੰਕਾ ਹੈ। ਸਮਾਰਕ ਦੀ ਸੁਰੱਖਿਆ ਤੇ ਢਾਂਚੇ ਦੀ ਜਾਂਚ ਵੀ ਕੀਤੀ ਜਾਵੇਗੀ।